ГOСУДАРСТВЕННОЕ УЧРЕЖДЕНИЕ ОБРАЗОВАНИЯ
"МОГИЛЁВСКАЯ ГОРОДСКАЯ ГИМНАЗИЯ №1"
Главная
Администрация
Одно окно
Наша символика
Наши новости
Контакты

Родителям

Субботняя школа "Развитие"

Шестой школьный день

Папулярызацыя беларускай мовы

Учителю

Выпускнику

Инновационная деятельность

Попечительский совет

Общественные

организации

Библиотечный центр

Гимназическая печать

Расписания

Поздравляем

Фотоальбомы

Психологическая служба

Ура! Каникулы!

Школа безопасности

За страницами учебников

Школьный музей "Боевой путь 50-й армии в годы ВОВ"

 

Папулярызацыя беларускай мoвы
 

Аб навучанні ў 2017/2018 навучальным годзе на базе дзяржаўных устаноў адукацыі г. Магілёва ў класах з беларускай мовай навучання

 

План папулярызацыi роднай мовы
на 2017/2018 навучальны год

 

09.02.2018 г.

Першая спроба пяра

Ці ведалі вы,што раней гімназістаў вучылі пісаць вершы,а ў дапамогу ім выдаваліся слоўнікі рыфмаў? Канечне, паэзіяй такі занятак не назавеш, а вось цікавай гульнёй можна. І называецца яна бурымэ. Такім чынам, бурымэ –гэта вершы, складзеныя па зададзеных рыфмах.

Паспрабаваць напісаць некалькі вершаваных радкоў на тэму “Скарбы”, ужываючы рыфмаваныя словы мова – слова;скарбаў – фарбаў з першым радком “Пявучая родная мова…”, было прапанавана вучням 7-ых класаў. І вось што з гэтага атрымалася.

 

***

Пявучая родная мова…

Як добрае матчына слова,

Змяшчае ў сабе столькі фарбаў

І дарагіх сэрцу скарбаў.

         Рукус Віталіна.

 

***

Пявучая родная мова…

Якія цудоўныя словы!

У іх россып вясёлкавых фарбаў,

Сапраўдных каштоўнасцей, скарбаў.

        Філіпенка  Дар’я.

 

***

Пявучая родная мова…

У ёй толькі добрыя словы.

У ёй столькі розных фарбаў,

Больш, чым у піратаў скарбаў.

         Магільная Марыя.

 

***

Пявучая родная мова…

Цёплае матчына слова…

Роднай зямлі гучанне і фарбы,

Нашай душы таямнічыя скарбы.

         Заўялава Ніка.

 

***

Беларуская мова! Беларуская мова!

Для мяне і для вас гэта роднае слова!

Колькі нябачаных скарбаў

У гэтай сімфоніі фарбаў!

        Юрэвіч Мая.

 

***

Пявучая родная мова…

Поўная казачных скарбаў

Майстэрня цудоўнага слова,

Бліскучых і радасных фарбаў.

        Дзенісенка Ульяна.

 

… Прафесіяналізм жа бурыміста заключаецца ў тым, каб рыфмаваць імгненна…

 

02.02.2018 г.

Што мне пекны Парыж, Рым прыгожы і слынны,

Што швейцарскія горы, старыяАфіны,

Што мне Вена, Мадрыд, што мне Лондан туманны,

Больш за ўсё я бацькоўскаму краю адданы!

В. Дунін-Марцінкевіч

Гэтыя радкі, што ідуць ад шчырага сэрца, сталі  асноўным лейтматывам  літаратурна-гістарычнай гадзіны “Больш за ўсё я бацькоўскаму краю адданы!…”, прысвечанай  210-годдзю з дня нараджэння Вінцэнта Дуніна-Марцінкевіча  –  паэта-патрыёта, перакладчыка,  празаіка і драматурга, стваральніка беларускага тэатра, першага прафесійнага пісьменніка нашай Магілёўшчыны, асветніка, грамадскага дзеяча, аднаго з пачынальнікаў новай беларускай літаратуры . 

Гэта сустрэча, якая адбылася першага лютага, стала сапраўдным святам для дзевяцікласнікаў. Вучні падрыхтавалі паведамленні і прэзентацыі аб жыцці і дзейнасціБеларускага Дудара, чыталі ўрыўкі з твораў паэта і драматурга, разгадвалі крыжаванкі, слухалі радыёзапісы ўрыўкаў з камедый, праявілі свае акцёрскія здольнасці ў міні-інсцэніроўках да п’есы “Пінская шляхта”, пазнаёміліся з выказваннямі  пісьменнікаў пра творчасць і дзейнасць В. Дуніна-Марцінкевіча, завочна наведалі мясціны, дзе ўстаноўлены помнікі пісьменніку, падзяліліся сваімі думкамі і ўражаннямі.

А вучні  сёмых класаў  пазнаёміліся з  урыўкам   Я. Коласа “Дзядзька-кухар” з паэмы “Новая зямля”. Яны актыўна ўдзельнічалі ў арт-праекце “Залацінкі роднай мовы” і складалі свой тлумачальны слоўнік   цікавых слоў, аздабляючы яго малюнкамі.

 

25.01.2018 г.

МАЁ ЛЮБІМАЕ БЕЛАРУСКАЕ СЛОВА

У чацвер, 18 студзеня, вучні 6-х і 8-х класаў гімназіі атрымалі незвычайнае заданне: вызначыць любімае беларускае слова, зрабіць фотаздымак і ў каментары да фота напісаць сказ ці верш з абраным словам. Пры гэтым заданне дзеці выконвалі ў зручны ім час, на працягу тыдня змяшчалі ў сацыяльных сетках фотаздымкі, суправаджаючы ім хэштэгам #маёлюбімаеслова.

Як вядома, сучасныя дзеці актыўна карыстаюцца сацыяльнымі сеткамі, таму заданне размясціць там фотаздымак з словам па-беларуску і каментаром да яго выклікала вялікую цікавасць. Прыемна адзначыць, што многія вучні творча падышлі да задання і не толькі прыгожа напісалі слова ды сфатаграфаваліся з ім, але і падабралі вельмі глыбокую цытату ці верш у якасці каментара. Пры гэтым любімае беларускае слова шукалі нават тыя дзеці, якія самі даведаліся пра гэтае заданне ад сяброў ці аднакласнікаў!

Мы ведаем, што беларуская мова вельмі прыгожая і мілагучная. Гэта мова нашых лясоў, гаёў і рэк. Гэта мова мірнага блакітнага неба і яркага сонейка, што так і ззяе сваёй дабрынёй.

Калі даводзіцца разважаць над пытаннем пра любімае беларускае слова, мы задумваемся. Сярод мноства слоў з розным сэнсам трэба выбраць толькі адно, якое найбольш кранула сэрца. Некаторыя словы нагадваюць нам пра радасныя ўспаміны, а некаторыя пра такія ўспаміны, ад якіх сэрца аддалена заслонай смутку і меланхоліі. Яшчэ, відаць, у кожнага чалавека ў пэўны час ёсць сваё любімае слова, якое потым можа замяніць іншае.

Якія ж словы зацікавілі дзяцей? Гэта сям’я, сяброўства і сябры, маці і матуля, шчасце, мара, калі ласка, дабро і дзякуй, жыццё і мір, адпачынак і Беларусь!

А якое ваша любімае беларускае слова?

 

17.01.2018 г.

Ой, калядачкі, бліны-ладачкі…

Добры вечар! Шчодры вечар!

Пачуўшы гэтыя словы, адразу ўяўляеш беларускую вёску, сялянскую хату са шчодрымі гаспадарамі і багатым сталом, з вясёлымі песнямі, гульнямі і, безумоўна, калядоўшчыкамі.

Старая добрая традыцыя калядавання жыве і ў нашай гімназіі.З самай раніцы 12 студзеня распачалося тэатралізаванае прадстаўленне ў фае гімназіі. Вясёлыя хлопцы і дзяўчаты, апранутыя хто казой, хто мядзведзем, хто цыганом, хто цыганкай песнямі, гульнямі, танцамі віталі гімназістаў і іх бацькоў. Калядоўшчыкі шчыра жадалі ўсім прысутным шчасця, здароўя, дабрабыту, плёну ў працы.

А надалей калядныя гурты «вандравалі» па кабінетах гімназіі, віншуючы дзяцей і настаўнікаў з Калядамі. Разам з віншаваннямі гучалі песні, прыказкі, загадкі. За гэта гаспадары адорвалі калядоўшчыкаў рознымі пачастункамі: цукеркамі, пернікамі, печывам, садавіною. Свята прынесла вялікую радасць, асалоду і задавальненне ўсім.

   

17.01.2018 г.

Ой, калядачкі, бліны-ладачкі…

Добры вечар! Шчодры вечар!

Пачуўшы гэтыя словы, адразу ўяўляеш беларускую вёску, сялянскую хату са шчодрымі гаспадарамі і багатым сталом, з вясёлымі песнямі, гульнямі і, безумоўна, калядоўшчыкамі.

Старая добрая традыцыя калядавання жыве і ў нашай гімназіі.З самай раніцы 12 студзеня распачалося тэатралізаванае прадстаўленне ў фае гімназіі. Вясёлыя хлопцы і дзяўчаты, апранутыя хто казой, хто мядзведзем, хто цыганом, хто цыганкай песнямі, гульнямі, танцамі віталі гімназістаў і іх бацькоў. Калядоўшчыкі шчыра жадалі ўсім прысутным шчасця, здароўя, дабрабыту, плёну ў працы.

А надалей калядныя гурты «вандравалі» па кабінетах гімназіі, віншуючы дзяцей і настаўнікаў з Калядамі. Разам з віншаваннямі гучалі песні, прыказкі, загадкі. За гэта гаспадары адорвалі калядоўшчыкаў рознымі пачастункамі: цукеркамі, пернікамі, печывам, садавіною. Свята прынесла вялікую радасць, асалоду і задавальненне ўсім.

 

25.12.2017 г.

Такая рознакаляровая палітра

Колькі радасці, колькі натхнення,

Калі фарбы змяняе сезон!

Малінавы,васільковы, смарагдавы, аксамітны, барвовы, залацісты, пурпуровы і, канечне, усе колеры вясёлкі…

Зялёны – колер травы, лістоты дрэў, “вечны” колер елкі і сасны; жоўты – колер сонца, дзьмухаўца і спелых каласоў жыта; чырвоны – колер спелага яблыка і парэчкі; блакітны – колер вады ў рацэ, чыстага неба, колер незабудкі, вясёлых званочкаў; белы – колер аблокаў, што плывуць у небе, колер пялёсткаў рамонка і снегу; аранжавы – колер футра жвавай вавёркі і восеньскіх лістоў на клёне; фіялетавы – колер спелай смачнай слівы і веснавога бэзу…

Складанне слоўнікаў “Фарбы беларускай зямлі”, па ўсім відаць, натхніла вучняў 7-х класаў на тое, каб бліжэй пазнаёміцца з вершамі беларускіх паэтаў, прысвечанымі прыродзе, звярнуць увагу на маляўнічасць родных краявідаў, душою адчуць іх прыгажосць:

Стаіць,

Выглядючы з жыта,

Як зорачка-знічка,

Здалёк,

Што ўпала

Іскрынкай

З блакіту,

Палеткаў краса –

Васілёк.

   

 

18.12.2017 г

З Новым годам, што крыніцай

Новай пойдзе ў пераходзе,

Беларуская зямліца!

Беларускі наш народзе!

Я. Купала

На парозе Новы год. Для дарослых і дзяцей гэта асаблівы час. Час спадзяванняў, надзей, цудаў, невярагодных здарэнняў, смачных падарункаў, чаканых і нечаканых сюрпрызаў, пах мандарынаў. Іменна такія асацыяцыі назвалі пяцікласнікі падчас імпрэзы, прысвечанай навагоднім святам. Вучні падрыхтавалі вершы беларускіх пісьменнікаў М.Багдановіча, К.Буйло, М. Танка, М. Пазнякова, Я. Коласа, Я.Купалы. У вершах гучалі словы пра навагоднюю елку, падарункі, атмасферу свята. На маленькіх папяровых елачках вучні напісалі пажаданкі сваім блізкім па-беларуску і абяцалі падарыць ім пад Новы год.

 

09.12.2017 г

Наш боль, наша годнасць і слава

Сягоння ў нас думы адны:

Мір нам патрэбен,

Не трэба вайны!..

П. Броўка

У чацвер, 7 снежня, падчас імпрэзы-дыялога “Вайна глядзіць праз кніжныя старонкі” вучні сёмых класаў гаварылі пра подзвіг нашага народа ў гады Вялікай Айчыннай вайны. Гутарка была цікавай, пазнавальнай і змястоўнай. Сямікласнікі паўдзельнічалі ў конкурсе знаўцаў “ Што я ведаю аб вайне?”, зрабілі віртуальную вандроўку па месцах баявой славы Магілёўшчыны, пабывалі на прэзентацыі альбома мастака М. Савіцкага “Лічбы на сэрцы”, расказалі пра сваіх родных – удзельнікаў  вайны,  наведалі міні-выставу кніг пра вайну, зачыталі  ўрыўкі з кнігі “Ніколі не забудзем”, падзяліліся сваімі ўражаннямі ад пачутага і ўбачанага.

  На працягу імпрэзы як своеасаблівы помнік загінуўшым на вайне гучалі творы Р. Барадуліна, В. Зуёнка, А. Вярцінскага, В. Быкава,  П. Броўкі, П. Панчанкі і нашых землякоў-магілёўцаў А. Куляшова і А. Пысіна.

У час дыялога абыякавых не было, бо такая гутарка вучыць мужнасці і адвазе, бясстрашнасці і высокай маральнасці, шчырай адданасці Айчыне і змаганню за мір і справядлівасць. 

 

05.12.2017 г

Якія знаёмыя назвы і словы,

Якая цудоўная родная мова!

І усё мілагучна для слыху майго:

І звонкае “дзе” і густое “чаго”….

Пімен Панчынка.

30 лістапада вучні 6-х класаў бралі ўдзел у лінгвістычным конкурсе “Любі, шануй, ведай роднае слова!”. У мерапрыемстве, якое праходзіла ў форме КвіЗ, удзельнічалі дзве каманды. Спаборніцтва было цікавым, займальным, пазнавальным. “Размінка”, “Крыжаванка”, “Турнір капітанаў”, “Перакладчык”, “Словы-змейка” – гэтыя конкурсы дапамагалі вучням праявіць актыўнасць, кемлівасць, знаходлівасць, артыстызм, узаемападтрымку.

 

21.11.2017 г

Дакументальныя фотаздымкі і ўласныя малюнкі, строгія лічбы і хвалюючыя радкі вершаў…

3 конкурсу праектаў “Зямля мая бой прымала”, прысвечаных падзеям Вялікай Айчыннай вайны, пачалася гаворка пра творчасць Васіля Быкава, яго апавяданне “Незагойная рана” ў 7-х класах.

Вельмі розныя, усе праекты без выключэння сведчылі пра добрасумленнасць і зацікаўленасць, з якой іх аўтары падышлі да стварэння сваіх творчых работ. Праекты дапамаглі эмацыянальна падрыхтавацца да сустрэчы з творчасцю пісьменніка–франтавіка.

 

21.10.2017 г

.

Янка Купала і Якуб Колас… Гэтыя імёны вядомыя нам з дзяцінства. Велічныя постаці вялікіх песняроў суправаджаюць кожнага свядомага беларуса праз ­ўсё жыццё. Іх творы – гэта не толькі наш нацыянальны здабытак. Яны  паставілі беларускую літаратуру побач з іншымі літаратурамі свету. “Янка Купала і Якуб Колас – гэта тыя вежы, па якіх мы, беларусы, бачым  цэлы свет і па якіх свет бачыць нас”, – менавіта так пісаў пра класікаў беларускай літаратуры пісьменнік і паэт Віктар Шніп.

 Гэтыя слаўныя сыны Беларусі ў сваіх творах праўдзіва адлюстроўвалі нацыянальны быт і характар беларусаў, непаўторнасць і прыгажосць прыроды нашай краіны. Менавіта пра родную прыроду, яе чароўнасць і казачнасць гаварылі вучні сёмых класаў у чацвер, 19 кастрычніка.

Дзяўчынкі і хлопчыкі 7 “Б” класа падрыхтавалі для вучняў сваёй паралелі паэтычны  вернісаж “ Слова Я. Купалы і Я. Коласа аб роднай прыродзе”.  У час мерапрыемства  дзеці паглядзелі невялікія відэасюжэты пра жыццё і творчасць пісьменнікаў-юбіляраў, паслухалі музычныя творы, напісаныя на вершы паэтаў. Яркія пейзажныя карціны прэзентацыі падмацоўваліся  вершамі і ўрыўкамі з празаічных твораў пісьменнікаў. Напрыканцы сустрэчы вучні абмеркавалі ўсё ўбачанае і пачутае і прыйшлі да высновы: Янка Купала і Якуб Колас пры дапамозе роднага слова стварылі непаўторныя пейзажныя карціны, якія надоўга застануцца ў памяці, і кожны можа ганарыцца тым, што такія вялікія мастакі слова – нашы землякі-беларусы.

 

19.10.2017 г.

Пад небам Я. Купалы і Я. Коласа

Янка Купала і Якуб Колас – гэтыя імёны ў нашым уяўленні ўзнікаюць неадрыўна разам. Мы гаворым Янка Купала – і працягваем  Якуб Колас. Два народныя пісьменнікі Беларусі, Песняры, як іх яшчэ з цеплынёй называюць. Сябры, сучаснікі, паплечнікі, аднагодкі. Абодва  шмат зрабілі на карысць свайго народа,  краю. Яны апісвалі жыццё простага чалавека, яго думкі, пачуцці, спадзяванні, імкнуліся спазнаць душу беларускую. Песняры былі блізкія па сваіх поглядах, ідэалах, але розныя ў творчасці. У кожнага – свой шлях, і характар, і духоўны свет, і непаўторны стыль. Агульнае ж тое, што іх творы і сёння ў вялікай пашане ў беларусаў.  

Менавіта  творчасці гэтых двух класікаў літаратуры быў прысвечаны тыдзень беларускай мовы і літаратуры, які працягваўся з дзявятага па чатырнаццатага кастрычніка. Да тыдня былі аформлены два змястоўныя інфармацыйныя стэнды “Пісьменнікі-юбіляры” і “Як ты дорага мне, мая родная мова!..”,  выпушчана радыёгазета “І не знікаць паэтам вечна…”.

Вучні адзінаццатых класаў бралі ўдзел у літаратурнай сустрэчы “І сёння з намі Колас і Купала”, дзе пры дапамозе прэзентацыі былі згаданы біяграфічныя і творчыя старонкі жыцця Янкі Купалы і Якуба Коласа. Падчас сустрэчы пранікнёна і чулліва вучнямі чыталіся творы гэтых пісьменнікаў, гучалі песні, напісаныя на вершы класікаў.

На працягу тыдня вучні пятых класаў “адкрывалі нанова беларускае роднае слова ”. У займальнай і цікавай форме дзеці складалі крыжаванку на тэму “Лён”, адгадвалі шарады, слухалі паданні аб кветках, дапаўнялі прыказкі і прымаўкі, тлумачылі значэнні слоў і фразеалагізмаў. Усе заданні суправаджаліся вершамі аб роднай мове. Задавальненне атрымалі ўсе, бо кожны ўдзельнік для сябе адкрыў сваё беларускае роднае слова.

Удзельнікамі віртуальнага часопіса “ І не змоўкнуць  ніколі ў свеце іх словы”, прысвечанага 135-годдзю з дня нараджэння Я. Коласа і Я. Купалы, сталі 13 кастрычніка дзевяцікласнікі. Вучні  9 “Б” класа падрыхтавалі для сваіх сяброў цікавы і вельмі пазнавальны матэрыял з жыцця юбіляраў. Старонкамі часопіса сталі ўспаміны саміх пісьменнікаў , запісаныя Максімам Лужаніным у кнізе “Колас расказвае пра сябе” і Сцяпанам Александровічам  у кнізе “”Свой пачэсны пасад”. Прэзентацыя ж, якая суправаджала аповед, дала магчымасць зазірнуць у залы музеяў, прысвечаных беларускім класікам, і на свае ўласныя вочы ўбачыць, як жылі і тварылі паэты. Напрыканцы сустрэчы прагучалі вершы нашых вялікіх Песняроў,  ужо даўно знаёмыя і мала вядомыя… 

У чацвер, 12 кастрычніка, вучні пятых-адзінаццатых класаў мелі магчымасць выказаць пяшчотныя пажаданні сваім матулям у паштоўцы-віншаванцы, прысвечанай Дню маці. Хлопчыкі і дзяўчаткі жадалі сваім родным здароўя, поспеху, натхнення, маладосці, радасці і весялосці, любові і шчасця, дабра, прыгажосці, цеплыні, пяшчоты…  І гэта далёка не ўсе словы, якія вучні адрасавалі сваім мамам, мамачкам, матулечкам, мамусенькам!  

Такія мерапрыемствы дазваляюць нам больш упэўнена адчуваць сябе на нашай зямлі, дакрануцца да вялікай спадчыны і культуры беларускага народа, ганарыцца сваёй мовай і сваёй Радзімай.

 

19.09.2017 г.

І САФІЯ ПЛЫВЕ НАД ДЗВІНОЮ, НІБЫ КАРАБЕЛЬ…

Сёлета Дзень беларускага пісьменства быў прымеркаваны адразу да двух знакавых юбілеяў – 500-годдзя беларускага кнігадрукавання і 1155-годдзя найстаражытнейшага беларускага горада – Полацка. Невыпадкова менавіта Полацк – калыска беларускай дзяржаўнасці, радзіма нашага першадрукара – быў абраны сталіцай знакавага свята. Настаўнік беларускай мовы і літаратуры гімназіі Каласоўскі Ю.У. наведаў сталіцу свята беларускага слова ўжо 11-ы год запар!

Дзень беларускага пісьменства ў Полацку парадаваў, прадставіўшы ўласныя цікавінкі. Найперш ладзілася шмат тэатралізаваных пастановак, напрыклад, драматычны захоп Полацка варагамі, перамога над ворагам. А многія артысты і гандляры былі прыбраныя ў вышываныя строі.

Адным з сімвалаў свята стаў новы помнік, усталяваны ў адным з самых маляўнічых месцаў горада – на стромкім беразе Дзвіны, побач з Сафійскім саборам, – памятны знак «Полацк – сталіца беларускай дзяржаўнасці». Зроблены ён у выглядзе шматлікіх шчытоў, складзеных разам. На іх – выявы важных гістарычных асоб Полаччыны, якія шмат значаць і для ўсёй Беларусі.

Па выніках вандроўкі ў Полацк Каласоўскі Ю.У. падрыхтаваў адмысловую віктарыну “Па сталіцах Дня беларускага пісьменства”, удзельнікамі якой сталі вучні 8-х класаў гімназіі.

● Калі пачалося святкаванне Дня беларускага пісьменства?

● Які раз Полацк стаў сталіцай свята?

● Які горад будзе сталіцай свята ў 2018 годзе?

● У якім горадзе да свята быў адкрыты помнік Франіцшку Багушэвічу?

● Які горад Магілёўшчыны быў сталіцай свята ў 2013 годзе?

На гэтыя і іншыя пытанні спрабавалі адказаць цікаўныя васьмікласнікі – і па выніках віктарыны дзеці не толькі спраўдзілі свае веды пра Дзень беларускага пісьменства, але і даведаліся шмат новых для сябе фактаў. А тыя вучні, хто паказаў найлепшыя вынікі, атрымалі прызы: сувеніры са старажытнага Полацка!

 

 

30.05.2017 г.

Святло далёкай зоркі, або Касмічныя падарожжы беларусаў

Як жа цікава чытаць фантастыку!  Шасцікласнікі чарговы раз упэўніліся ў гэтым, калі знаёміліся з кнігай Раісы Андрэеўны Баравіковай “Казкі астранаўта: касмічныя падарожжы беларусаў ”. Гэта сустрэча з творам фантастыкі была прысвечана  70-годдзю з дня нараджэння пісьменніцы, якое святкавалася ў маі.

Вучні пазнаёміліся з жыццём і творчасцю нашай зямлячкі, прачыталі асобныя апавяданні з кнігі “Казкі астранаўта ”, зрабілі свае ілюстрацыі да твораў, прымалі ўдзел у віктарыне, разгадвалі крыжаванку. Чытальнікі адзначылі, што, нягледзячы на адлюстраванне касмічных падарожжаў, адной з галоўных тэм кнігі з’яўляецца любоў да роднай Беларусі, зацікаўленасць яе гісторыяй і культурай. Раіса Баравікова  ў казках фантастычным чынам тлумачыць паходжанне некаторых раслін, птушак і насякомых (касач, венерын чаравічак, змеегалоўнік Руйша, страказа,  гальштучнік і інш.). Героі кніг пісьменніцы – беларусы, якія паважаюць сябе і сваю гісторыю, любяць сваю краіну, што дапамагае ім паважаць і прадстаўнікоў іншых планет.

Гэта была першая сустрэча з творамі Раісы Баравіковай і, спадзяёмся, не апошняя!

 

23.05.2017 г.

«Кніга  невычэрпная крыніца, што поіць вечнай мудрасцю...» гэтыя словы Кірылы Тураўскага сталі эпіграфам да гульні-падарожжа «Святло друкаванага слова», у якой 18 мая бралі ўдзел  вучні пятых класаў гімназіі. У час прагляду  прэзентацыі «Гісторыя ўзнікнення кнігі» удзельнікі падарожжа прасачылі асноўныя этапы, якія пераадолела кніга на шляху да сваёй сучаснай выявы, апынуліся ў залах старажытных і сучасных бібліятэк, вучыліся карыстацца бібліяграфічным даведнікам.

Першы беларускі асветнік Францыск Скарына паўтысячы гадоў таму прынёс друкаваную кнігу «Псалтыр» да сябе на Радзіму. І з гэтай кнігі пачаўся на нашай зямлі беларускай развівацца кнігадрук.

Паважаныя сябры! Чытайце! Напаўняйце сэрца і душу светам слова!

 

10.05.2017 г.

Напярэдадні вялікага свята – Дзень Перамогі, калі кожны чалавек напаўняе душу асаблівым пачуццём, калі ў думках пераносіцца ў тыя далёкія ваенныя гады ліхалецця, вучні гімназіі  распытвалі сваіх блізкіх і знаёмых, якія былі сведкамі ці ўдзельнікамі Вялікай Айчыннай вайны, аб тым, чым была для іх гэта вайна.

У час правядзення вечарыны памяці “Ваша слава ўстане абеліскам” панаваў асаблівы настрой, бо гучалі з вуснаў ужо трэцяга пакалення, якое нарадзілася пасля вайны, словы аб пакутах і мужнасці, аб страху і адвазе, аб голадзе і высакароднасці, аб вялікай цане міру і пагрозах сённяшняй бяспецы. Удзельнікі паведамлялі аб тым, як прайшлася вайна па лёсах іх сем’яў, які след яна пакінула ў душах блізкіх. Аб гэтым патрэбна ведаць, пра гэта нельга забыць.

Няхай вайна застанецца ў памяці яшчэ многіх пакаленняў толькі ўспамінам!

 

28.04.2017 г.

“Зямля мая – зялёны дом” – так называлася выстаўка малюнкаў, якую наладзілі вучні 6-ых класаў. Вясна – пара абуджэння прыроды, калі  яе прыгажосць асабліва прывабная, а жаданне захаваць цуд акаляючага нас свету асабліва вострае.

Але не толькі вясеннія пейзажы можна было бачыць на малюнках удзельнікаў выстаўкі. Тут і поле спелай збажыны, і магутныя дубы пасярод квітнеючага лугу, і рэчка, што імкне некуды ўдаль, і стары пень, парослы апенькамі, і воблакі ў бяздонным сінім небе…

Рабяты падрыхтавалі каментарыі да работ. Яны расказалі пра тое, што  намалявалі, чаму выбралі менавіта гэтыя вобразы, якую каляровую гаму выкарысталі, а таксама прапанавалі, як казаў беларускі паэт Пімен Панчанка ў сваім вядомым вершы “Сармацкае кадзіла”, “захады і меры” па ахове прыроды. Сярод гэтых прапаноў – вельмі шмат па-сапраўднаму слушных, разумных. Напрыклад, не зрываць кветак на лузе ці ў лесе, не ламаць бэзу на гарадскіх вуліцах, а проста рабіць фотаздымкі на памяць аб гэтай прыгажосці; вучыць берагчы і ахоўваць прыроду сваіх сяброў, малодшых братоў і сясцёр… Цікавыя аргументы суправаджалі прапанову больш ездзіць на веласіпедах ці  хадзіць пешшу: і прыгажосць наваколля ўбачыш, і здароў’е зберажэш

У добрым настроі развіталіся юныя мастакі да наступнай выстаўкі!

 

08.04.2017 г.

Вучні 10 класаў сталі гледачамі містыка-рамантычнай гісторыі ў дзвюх дзеях па аднайменнай аповесці Уладзіміра Караткевіча «Дзікае паляванне караля Стаха». Наследны замак Яноўскіх перамясціўся на час у Магілёўскі тэатр лялек.

Прыгожыя лялькі, утульная зала, цікавы, займальны сюжэт, незвычайныя спецэфекты. Захапляючая гісторыя пра каханне, нянавісць і іншыя страсці людскія. Ён, вучоны-фалькларыст Андрэй Беларэцкі, адправіўся пазнаваць народную творчасць у самую глуш. Яна, Надзея Яноўская, уладальніца радавога маёнтка, апошняя з роду Яноўскіх. Але што аб'ядноўвае такіх розных людзей? Легенда пра караля Стаха. Каханне, смерць, рэальнасць, містыка, дабро, зло, маленькі чалавек, блакітная жанчына. А можа гэта толькі ўяўленне, узмоцненае страхам? Можа хто-небудзь хоча прысвоіць сабе спадчыну роду Яноўскіх? Хто атрымае перамогу? Адказы на многія пытанні атрымалі вучні ў час спектакля. А разгадкі іншых таямніц чакаюць вас, дарагія сябры, на старонках аповесці Уладзіміра Караткевіча «Дзікае паляванне караля Стаха». Чытайце!

 

28.03.2017 г.

Найвялікшыя вяршыні можна разгледзець толькі з адлегласці...

У кожнага народа сярод класікаў нацыянальнага пісьменства вылучаюцца постаці найгалоўныя, якія ўнеслі асаблівы ўклад у развіццё роднай літаратуры, мовы і культуры, сталі своеасаблівымі сімваламі самога народа. У англічан гэта Уільям Шэкспір, у рускіх – Аляксандр Пушкін, у амерыканцаў – Уолт Уітмен... У беларусаў – гэта постаці Янкі Купалы і Якуба Коласа, 135-годдзе з дня нараджэння якіх мы адзначаем у 2017 годзе. І чым далей адыходзіць час, калі яны жылі і тварылі, тым усё больш выразна бачым мы веліч песняроў. Гэта не дзіўна, бо найвышэйшыя вяршыні можна разгледзець толькі з адлегласці.

 Адзіны дзень беларускага маўлення 22 сакавіка быў прысвечаны творчасці знакамітых беларускіх песняроў Янкі Купалы і Якуба Коласа. Бібліятэчна-інфармацыйны цэнтр гімназіі запрасіў да наведвання кніжнай выставы “Імёны, якімі паэтаў сваіх Беларусь называла – Колас, Купала...”, дзе кожны наведвальнік меў магчымасць пазнаёміцца з біяграфічнымі звесткамі і пералікам твораў класікаў беларускай літаратуры, выбраць цікавую кнігу для чытання, прыняць удзел у віктарыне “На кожнай сцяжынцы іх песня і голас”.

     У захапляльнае падарожжа па “лесніковай пасадзе” адправіліся вучні 5-7-ых класаў разам з героямі паэмы Я.Коласа “Новая зямля”, сцежкамі грознага Машэкі з паэмы Янкі Купалы “Магіла льва” блукалі вучні 8-9-ых класаў  у час акцыі “Чытаем разам творы Янкі Купалы і Якуба Коласа”.
     Запрашаем усіх аматараў беларускага слова дакрануцца да неўміручай творчасці беларускіх песняроў. Добрых уражанняў!

 

20.03.2017 г.

Не толькі пра мову, але і на мове

У чацвер, 16 сакавіка, чарговы дзень беларускага маўлення быў прысвечаны настольнай гульні “Мова”. Акрамя таго, вучні старэйшых класаў наведалі відэаўрок, на якім дэманстраваліся відэаролікі пра беларускую мову.

Выкарыстоўваючы настольную гульню “Мова”, вучні 7-х і 9-х класаў падрыхтавалі вусныя выказванні па той ці іншай тэме. Так, з вуснаў вучняў можна было пачуць паведамленні пра вандроўку, музей, мастацтва, горад, тэатр, кіно, пра знакамітых землякоў.

Акрамя таго, пасля прагляду відэаролікаў вучням было прапанавана вызначыць па тры беларускія словы, якія ім найбольш спадабаліся ці запомніліся. У выніку, паглядзеўшы мультфільмы “Беларускія прымаўкі”, “Як служыў жа я ў пана”, відэаролікі “20 фактаў пра Беларусь”, “Будзьма беларусамі!” і іншыя, вучні адзначылі тыя словы, якія найбольш ім запомніліся ці спадабаліся.

Вось пералік найбольш папулярных слоў, адзначаных вучнямі пасля наведвання відэаўрока: коўзанка, патэльня, брамнік, кава, кідок, алей, кроп, кнігарня, тарка, шануйце.

Вельмі прыемна адзначыць, што многія дзеці з радасцю адгукнуліся на прапанову напісаць водгук па прагледжаных відэароліках, выкарыстаўшы ў ім новыя для сябе беларускія словы!

 

25.09.2017 г.

Аддзел адукацыі, спорту і турызму Магілёўскага гарвыканкама даводзіць да ведама зацікаўленых, што ў 2017/2018 навучальным годзе  працуе першы клас з беларускай мовай навучання на базе дзяржаўнай установы адукацыі «Сярэдняя школа № 1 г. Магілёва» (вул. Першамайская, 24).

Акрамя таго, працягваюць працаваць класы з беларускай мовай навучання: другі клас – на базе дзяржаўнай установы адукацыі «Сярэдняя школа № 34 г. Магілёва» (вул. Габраўская, 16), 8 клас – на базе дзяржаўнай установы адукацыі «Сярэдняя школа № 1 г. Магілёва» (вул. Першамайская, 24).

Па пытаннях навучання дзяцей у гэтых класах трэба звяртацца па тэлефонах 22 12 64, 31 07 85 («Сярэдняя школа № 1 г. Магілёва»);

24 52 29, 24 50 15, 24 52 61 («Сярэдняя школа № 34 г. Магілёва»).

Назад

 

13.03.2017 г.

Адна з вуліц нашага роднага горада носіць імя беларускага паэта Аляксея Пысіна. А вось аб тым, што вядомы аўтар – наш зямляк, многія шасцікласнікі даведаліся толькі, калі сталі ўдзельнікамі завочнай экскурсіі “Шляхамі Аляксея Пысіна”.

У сакавіку Аляксею Васільевічу Пысіну споўнілася б 97 гадоў. На жаль, паэт пайшоў ад нас у росквіце творчых сіл, хутка пасля свайго 60-годдзя.

Але засталіся яго вершы. У зборніку “Вярбовы мост” сабраны лепшыя з твораў, якія паэт адрасаваў менавіта маладым людзям. Яны пра свет, жыццё, будучыню … і пра вайну, якую А. Пысіну давялося перажыць. Зборнік аздоблены чорна-белымі графічнымі рысункамі. Удзельнікі завочнага знаёмства з творчасцю паэта паспрабавалі суаднесці змест вершаў з уласнымі ўяўленнямі і стварыць каляровыя малюнкі-ілюстрацыі да зборніка. Было цікава!

 

06.03.2017 г.

Люблю цябе, мой Магілёў!

Дзе нарадзіўся, там і згадзіўся.

Беларуская народная прыказка.

У чацвер, 2 сакавака,  вучні 11-х класаў  пабывалі ў літаратурнай гасцёўні “Магілёўшчына літаратурная”, дзе мелі магчымасць падзяліцца ўражаннямі пасля знаёмства з творамі пісьменнікаў, ураджэнцаў Магілёўшчыны: А. Куляшова, І. Чыгрынава, М. Стральцова, А. Пісьмянкова, А. Сербантовіча.

Падчас сустрэчы чыталіся ўрыўкі з балады “Маці”, вершы  “ З далёкага” і “На паўмільярдным кіламетры” А. Куляшова, урыўкі з апавяданняў М.  Стральцова “Сена на асфальце”.  Адзінаццацікласнікі з цікавасцю чыталі вершы  А. Пісьмянкова і А. Сербантовіча і ў сваіх развагах адзначылі, што Магілёўшчына літаратурная ўпісала сваю слаўную старонку ў скарбонку літаратуры Беларусі .

А напярэдадні вучні 4-8 класаў наведалі літаратурна-музычную вечарыну, прысвечаную 750-годдзю горада Магілёва  “Мой горад славы легендарнай”, дзе  вучні восьмых класаў чыталі вершы пра родны горад, нагадалі ўрыўкі з паэмы Я. Купалы “Магіла льва”, пазнаёмілі ўсіх з летапісам горада Магілёва, пачынаючы з 1267 года і заканчваючы сучаснасцю, расказалі пра гераічную абарону горада ў часы Вялікай Айчыннай вайны, а навучэнцы музычнай школы гімназіі ўручылі роднаму гораду свае музычныя падарункі і віншаванні.  Напрыканцы свята ўдзельнікі  ад усяго сэрца жадалі гораду-юбіляру:

Магілёў! Ты наш край легендарны!

Заставайся такім навякі!

І няхай назаўсёды ў міры

Будуць шчасліва жыць землякі!

 

 

02.03.2017 г.

УРОК ЛІТАРАТУРЫ І МАЙСТАР-КЛАС
 НА ПАСЯДЖЭННІ ГАРАДСКОГА МЕТАДЫЧНАГА АБ’ЯДНАННЯ

 

Пасяджэнне гарадскога метадычнага аб’яднання настаўнікаў беларускай мовы і літаратуры, якое адбылося 27 лютага 2017 года ў гімназіі, было прысвечана абмеркаванню выніковасці выступленняў вучняў на прадметных алімпіядах і вызначэнню эфектыўных метадаў і формаў работы з высокаматываванымі вучнямі.

У рамках пасяджэння яго ўдзельнікам – настаўнікам беларускай мовы і літаратуры школ і гімназій Магілёва – было прапанавана папрысутнічаць на ўроку беларускай літаратуры ў 7 “Б” класе па тэме “Янка Брыль. “Сірочы хлеб”. Настаўнікі Даніка. Вобраз пані Мар’і”, які правёў настаўнік Ю.У. Каласоўскі. На ўроку Юрый Уладзіміравіч прадэманстраваў выкарыстанне элементаў стратэгіі актыўнай ацэнкі для складання характарыстыкі героя, пабудовы вуснага выказвання пра яго, абмеркавання жыццёвых прынцыпаў літаратурнага персанажа. Безумоўна, было цікава пазнаёміцца з меркаваннямі вучняў аб “ідэальным настаўніку”, з іх думкамі, выкліканымі аналізам твора Янкі Брыля.

Настаўніца беларускай мовы і літаратуры Г.У. Бандарэнка запрасіла ўдзельнікаў пасяджэння на майстар-клас “Аптымальныя метады і формы павышэння эфектыўнасці падрыхтоўкі вучняў да прадметнай алімпіяды і ЦТ”. Ганна Уладзіміраўна прадэманстравала разнастайныя формы “назапашвання” вучнямі літаратурнага матэрыялу, нестандартныя формы правядзення ўрокаў беларускай літаратуры, выкарыстанне метадаў перарванага чытання і трох аргументаў, прыёмаў усебаковага аналізу літаратурнага твора.

Асобна ўвага прысутных была звернута на адметнасці падрыхтоўкі і напісання водгуку на літаратурны твор.

Плённая і дынамічная праца, станоўчыя водгукі і словы падзякі прысутных – найлепшая ацэнка нашым настаўнікам, якія правялі пасяджэнне гарадскога метадычнага аб’яднання!

 

 

24.02.2017 г.

Усяму пачатак – родная мова

О мова матчына, пявучая мая!

Густая, нібы мёд, іскрыстая, як сонца!..

Алена Васілевіч.

Менавіта гэтыя словы сталі дэвізам чацвярга, 23 лютага, і былі звязаны з Міжнародным днём роднай мовы.

Добра, калі чалавек ведае шмат моў, але найперш неабходна валодаць родным словам і мовай таго народа, на зямлі якога жывеш. Сродкамі беларускай мовы, якая існуе ў вуснай і пісьмовай формах, адлюстроўваюцца нормы народнай маралі, выказваюцца самыя глыбокія думкі і найтанчэйшыя адценні пачуццяў. Беларускі народ у роднай мове пакінуў нашчадкам у спадчыну ўласнае разуменне каштоўнага і прыгожага. Нездарма людзі шаноўна і ласкава гавораць: роднае слова, матчына мова, родная мова, мова бацькоў і дзядоў…

Вучні дзявятых класаў у гэты дзень яшчэ раз упэўніліся, што беларуская мова – душа народа, наш неацэнны скарб, якім мы, беларусы, можам з годнасцю ганарыцца , і напісалі дыктоўку “Гімн роднай мове”.

У межах акцыі “Павіншуем абаронцаў Айчыны на роднай мове!”  вучні пятых-шостых класаў мелі магчымасць пазначыць свае віншаванні на рознакаляровых зорачках і падарыць яркі святочны феерверк.

Вучні шостых класаў бралі ўдзел у праекце “Вобразная, вольная, пявучая, мова беларуская мая!”, дзе ўдзельнікі прэзентавалі свае работы, аргументавалі выбар матэрыялу , чыталі творы вядомых беларускіх пісьменнікаў пра мову і прадстаўлялі свае выказванні пра роднае слова.  І хацелася б, каб не толькі ў гэты дзень, але і кожны дзень вучні гімназіі маглі далучыцца да слоў сучаснай паэтэсы Лідзіі Полазавай:

Вы паслухайце родную мову:

Жаўруковаю песняй звініць…

Колькі фарбаў, адценняў у слове!

Як пявуча ліецца-гучыць!

Веру, мова мая – будзе жыць!

 

   

 

18.02.2017 г.

Літаратурны брэйн-рынг, або Чытаем па-беларуску

У чацвер, 16 лютага, вучні 7-х класаў гімназіі прынялі ўдзел у гульні “Літаратурны брэйн-рынг”, падчас якой дзеці спрабавалі вызначыць самых начытаных і ўважлівых.

Падчас гульні-віктары камандам было прапанавана адказаць на пытанні, звязаныя з жыццём і творчасцю беларускіх пісьменнікаў, назваць псеўданімы мастакоў слова, пазнаць твор па цытаце, а таксама назваць літаратурнага героя па апісанні. Многае ў гульні залежала і ад капітанаў, якія маглі дапамагчы сваім камандам, называючы працяг паэтычных радкоў або вызначаючы жанр таго ці іншага твора.

Вучні з вялікай цікавасцю спрабавалі знайсці адказы на пастаўленыя пытанні, праяўляючы кемлівасць і высокую эрудыцыю.

І хаця, як і ў кожнай гульні, былі вызначаны пераможцы, можна сказаць, што пераможаных не было, паколькі кожны ўдзельнік гульні не толькі палепшыў свае веды па беларускай літаратуры, але і атрымаў зарад энегріі і пазітыву ад атмасферы добразычлівасці, у якой праходзіў конкурс.

Таксама вучням гімназіі ў межах акцыі “Чытаем па-беларуску” было прапанавана назваць свой любімы твор сучаснага беларускага аўтара і зачытаць цытату з гэтага твора.

Вельмі прыемна было пачуць, як вучмі называлі імёны сучасных беларускіх аўтараў: Віктара Жыбуля, Віталя Рыжкова, Віктара Марціновіча, Валерыі Куставай і іншых прадстаўнікоў беларускай літаратуры ХХІ стагоддзя.

Таксама вучням 7-х класаў было прапанавана падрыхтаваць плакаты да Міжнароднага дня роднай мовы, які будзе адзначацца ўжо ў бліжэйшы аўторак, 21 лютага.

 

10.02.2017 г.

Чалавека, які аздабляе  сваё маўленне фразеалагізмамі, прыказкамі, прымаўкамі, заўсёды цікава слухаць. Справядліва лічыцца, што ўжыванне  фразеалогіі – гэта адзін з паказчыкаў адукаванасці суразмоўцы. Сапраўднымі прыхільнікамі і знаўцамі роднай мовы праявілі сябе вучні восьмых класаў гімназіі ў чацвер, 9 лютага. У адзіны дзень беларускага маўлення іх аб’яднала лінгвістычная гульня “Сказана, як звязана”. Матэрыялам для гэтай гульні стала надзвычай багатая і разнастайная беларуская фразеалогія.

Вучні  шостых класаў у гэты дзень далучыліся да праекта “Шануйце родную мову”: узгадалі яе гісторыю, вылучылі асаблівасці, абмяняліся думкамі наконт шляхоў распаўсюджвання беларускага маўлення і аформілі інфармацыйныя лісты. Усе праектныя работы атрымаліся змястоўнымі і крэатыўнымі.

 

03.02.2017 г.

Час сустрэчы з паэзіяй

 

“Паэтычную скарбонку” адкрылі 1 лютага вучні 11-ых класаў гімназіі разам са сваёй настаўніцай Г.У.Бандарэнка. А напоўнена яна была вершаванымі радкамі на роднай беларускай мове, складзенымі вучнямі гімназіі. Хараство прыроды роднага краю, адносіны паміж людзьмі і чалавечыя пачуцці,  прысвячэнні роднаму гораду і краіне – далёка не поўны пералік тэм, якія ўзнімаюць гімназісты ў сваіх творах.

Удзельнікі мерапрыемства не толькі прэзентавалі ўласныя вершы, але і аналізавалі прадстаўленыя “на суд слухачоў” творы, выказвалі свае прапановы і  пажаданні пачынаючым паэтам.

Шмат станоўчых водгукаў выклікалі вершы незнаёмых аўтараў, знаёмства з якімі завяршала вечарыну. Гэтымі аўтарамі аказаліся былыя выпускнікі гімназіі, што яшчэ раз упэўніла прысутных у адзінстве інтарэсаў і імкненняў, неабыякавасці розных пакаленняў гімназістаў  да лёсу роднай мовы.

 

 

26.01.2017 г.

       

У батлейцы ўсё ідзе па калейцы!

Нова радасць стала,

Як і не бывала.

Над Бэтлеемам

Зорка ясна заззяла.

Менавіта такімі словамі пачынаецца традыцыйная народная батлейка, таму што першая сцэнка, якая з’явілася, гэта была сцэна нараджэння Ісуса Хрыста. У ёй распавядалася пра падзеі, якія адбыліся недалёка ад горада Бэтлеема (калісьці так называўся горад Віфлеем) – адсюль пайшла і назва – батлейка.

26 студзеня вучні шостых класаў актыўна ўдзельнічалі ў конкурсе юных батлейшчыкаў.  Кожная група ўдзельнікаў прадстаўляла батлейку, зробленую сваімі рукамі, і інсцэніравала эпізод з п’есы “Цар Ірад”. Якіх толькі батлеек не было! Вялікія і малыя, аднапавярховыя і двухпавярховыя, з лялькамі, зробленымі з паперы, і з лялькамі, пашытымі з тканіны. І нягледзячы на тое, што пераможцамі конкурсу стала група вучняў 6 “Б “класа, усе ўдзельнікі засталіся задаволенымі, бо змаглі адчуць сябе і акцёрамі, і мастакамі- афарміцелямі, і рэжысёрамі-пастаноўшчыкамі, і майстрамі-ўмельцамі.

     

 

21.01.2017 г.

Пра Беларусь, пра родны край!

У чацвер, 19 студзеня, некалькі груп сямікласнікаў на працягу дня задавалі вучням і настаўнікам гімназіі пытанні з гульні-віктарыны “Уся Беларусь”. Акрамя таго, настаўнікі беларускай мовы на сваіх уроках распавялі вучням пра традыцыю святкавання Вадохрышча.

Сямікласнікі, падзяліўшыся на групы, задавалі вучням і настаўнікам гімназіі пытанні пра вядомых ураджэнцаў Беларусі, пра жывёл і расліны нашай краіны, пра беларускія гарады. Прыемна, што абсалютная большасць апытаных правільна назвалі Максіма Багдановіча, Марка Шагала, Вінцэнта Дуніна-Марцінкевіча і Кастуся Каліноўскага. Не выклікалі цяжкасцяў у гімназістаў і пытанні пра зубра, бусла і рысь, адлюстраваную на гербе Гомеля. Праўда, балотную чарапаху адгадаць удалося не ўсім. Гэтаксама цяжка многім было пазнаць і нацыянальнага героя Беларусі, ЗША, Польшчы, Літвы Тадэвуша Касцюшку.

Упэўнены, што пасля правядзення гульні–апытання вучні і настаўнікі не толькі згадалі цікавыя факты пра Беларусь, яе гарады, прыроду і людзей, але чарговы раз пераканаліся ў тым, наколькі багатая на падзеі, імёны, жывёльны і раслінны свет наша краіна!

 

17.12.2016 г.

Нездарма кажуць: “Лепш адзін раз пабачыць, чым дзесяць раз пачуць”. А гімназісты ўпэўнена дададуць: “А яшчэ лепш – прыняць удзел ... у традыцыйным для беларусаў зімовым свяце – Калядкі!”. 13 студзеня вучні гімназіі сталі актыўнымі сведкамі і ўдзельнікамі калядных гулянняў. Зранку ў класныя кабінеты нечакана завіталі Гаспадар і Гаспадыня, Каза і Мядзведзь, Цыганка і нястомныя калядоўшчыкі, ролі якіх па-майстэрску выканалі вучні 5 “Б” і 5 “В” класаў пад кіраўніцтвам настаўніцы беларускай мовы і літаратуры Н.В.Сапега.

З вуснаў калядоўшчыкаў гучалі народныя песні, прыказкі, вершы на роднай беларускай мове. Госці зычылі гаспадарам моцнага здароўя і дабрабыту, а  яшчэ абсыпалі класныя пакоі зернем – напэўна, на добры ураджай станоўчых адзнак у бягучым навучальным годзе. Не засталіся ўбаку і гаспадары: кішэні і торбачкі калядоўшчыкаў напаўняліся шчодрымі дарамі.

Гоман і смех, песні пад гармонік, гукі бубна доўга гучалі ў калідорах і кабінетах гімназіі. Святкаванне Каляд прынесла шмат уражанняў і добры настрой гімназістам і іх настаўнікам, упэўніла ў неабходнасці звяртацца да беларускіх народных традыцый.

 

16.12.2016 г.

У вянок Максіму Багдановічу

Нашто каласы, калі няма васількоў?

М. Багдановіч

Кветкі зямлі! Так хочацца назваць вершы многіх беларускіх паэтаў. Кветкі разам з намі па жыцці з першых нашых дзён і да апошніх, бо кветкі – гэта хараство, прыгажосць, а без прыгажосці чалавек жыць не можа.

Кветкамі зямлі можна назваць і вершы паэта-песняра Максіма Багдановіча, чый юбілей адзначаецца ў гімназіі ўжо другі тыдзень.  Вучні гімназіі пастараліся ўплесці свае кветкі ў вянок Максіму Багдановічу.

Так у чацвер, 15 снежня, прайшла акцыя “Што я ведаю пра М.Багдановіча?” і паэтычны вернісаж “ Вечна юны, як наша зямля…”, які падрыхтавалі вучні 6 ”В” класа. У час мерапрыемства былі названы асноўныя этапы жыцця і дзейнасці паэта-патрыёта, прадэкламаваны вершы з адзінага прыжыццёвага зборніка М. Багадановіча “Вянок” , з нізкі вершаў  “У зачарованым царстве”, прагучалі  музычныя творы “Па-над белым пухам вішняў” і “Падвей”. Напрыканцы вернісажа вучні-ўдзельнікі і вучні-слухачы прачыталі разам  на памяць верш паэта “Зімой ”. Закончылася сустрэча пяшчотнымі словамі  вядучай:

Для цябе я збіраю вянок

З сціплых кветак зямлі беларускай.

Я зрываю валошкі і мак,

І, напэўна, зрываю не першай

Для цябе, беларускі юнак,

За твае незабыўныя вершы!

 

 

09.12.2016 г.

Пад зоркай Максіма

Бо як ёсць у народа такія –
Не загіне давеку народ.

Менавіта так пісаў пра Максіма Багдановіча Уладзімір Караткевіч. Гэтыя словы сталі асноўным дэвізам мерапрыемстваў, прысвечаных 125-годдзю з дня нараджэння М. Багдановіча, якія прайшлі ў гімназіі 8 снежня.

Зіхатлівая зорка паэзіі М. Багдановіча і праз цэлыя стагоддзі працягвае свяціць над роднай зямлёй усё ярчэй і ярчэй. У гэтым упэўніліся вучні, якія разам са сваімі настаўнікамі прайшліся па цярністых жыццёвых сцежках паэта-класіка, паэта-мастака, паэта-пакутніка і атрымалі асалоду ад дотыку да незабыўнага і незвычайнага  паэтычнага майстэрства юбіляра.

Вучні 8-х класаў глядзелі прэзентацыю “Вобраз кахання ў творчасці  М. Багдановіча”, а пяцікласнікі паўдзельнічалі ў конкурсе чытальнікаў” Мой любімы верш М. Багдановіча”. Завочна павандраваць па залах музея М.Багдановіча змаглі вучні 7-х класаў, а шасцікласнікі бралі ўдзел у літаратурных чытаннях “Пад зоркай Максіма” і разам з пяцікласнікамі аформілі выставу малюнкаў “ Творы М. Багдановіча нашымі вачамі”. Праверыць свае веды і здольнасці мелі магчымасць і вучні 10—11 класаў, адказваючы на пытанні віктарыны. Усе жадаючыя маглі наведаць выставу “ Святло паэзіі Максіма Багдановіча”, арганізаваную ў бібліятэцы гімназіі.

Мерапрыемствы пашырылі кругагляд вучняў, садзейнічалі больш глыбокаму вывучэнню літаратурнай спадчыны М. Багдановіча, узбагацілі ўнутраны свет навучэнцаў, спрыялі выхаванню пачуцця нацыянальнай годнасці і гонару за сваю Радзіму  і за яе геніяльнага творцу, бо кожны ўдзельнік мог з упэўненасцю сказаць:

Беларусы табой ганарацца,

Тут імя тваё дорага ўсім,

І так хораша нам называцца

Землякамі тваімі, Максім!

 

05.12.2016 г.

“Каласы пад сярпом тваім”, або А вы чыталі Караткевіча?

У першы дзень зімы ў гімназіі прайшоў традыцыйны дзень беларускага маўлення, які быў прысвечаны Уладзіміру Караткевічу – 26 лістапада народнаму пісьменніку Беларусі споўнілася б 86 год.

Да дня народзінаў пісьменніка сярод вучняў сёмых класаў была праведзена віктарына “Што я ведаю пра Уладзіміра Караткевіча?”. Таксама сямікласнікі зрабілі спробу пяра: вучням было прапанавана дапісаць сваю канцоўку аднаго з твораў У. Караткевіча.

Таксама вучні і настаўнікі гімназіі маглі атрымаць прыз – закладку ад беларускай інтэрнэт-бібліятэкі, – правільна адказаўшы на пытанні па творчасці аўтара “Дзікага палявання караля Стаха”, “Каласоў пад сярпом тваім” і “Ладдзі роспачы”. Вельмі прыемна, што большасць апытаных правільна адказала на пытанні. Так, правільным адказам на пытанне “У якіх гарадах ёсць помнікі Уладзіміру Караткевічу?” быў варыянт, у якім пералічваліся Віцебск, Орша і Кіеў.

Праведзеныя мерапрыемствы яшчэ раз нагадалі вучням і настаўнікам, што Уладзімір Сямёнавіч Караткевіч – адна з самых яркіх і шматгранных постацяў беларускай літаратуры ХХ ст.; чалавек, які стаў заснавальнікам беларускай гістарычнай раманістыкі, стварыў высокамастацкую гістарычную прозу, абуджаў у беларусаў пачуццё нацыянальнага гонару, цікавасць і любоў да гісторыі Бацькаўшчыны.

 

 

03.12.2016 г.

«З рога ўсяго многа» – так назвалі вучні 3 «Г» класа восеньскія пасядзелкі, у якіх удзельнічалі самі і на якія запрасілі шмат гасцей. І сапраўды, з гэтага чароўнага рога лілося шмат мілагучных песень, натхняючых вершаў, павучальных казак, прыказак і прымавак, складаных загадак на роднай беларускай мове. Вядучыя свята Алесь і Аленка запрашалі прысутных да ўдзелу ў беларускіх народных гульнях і забаўлянках, інсцэніроўках. Нельга было не ўразіцца і афармленнем класнага пакоя, у якім адбывалася свята. На пэўны час ён ператварыўся ў беларускую хату, запоўненую прадметамі побыту сялян, саматканымі посцілкамі, абрусамі, ручнікамі. Прыгожыя сурвэткі з паперы і тканіны, шматковыя лялькі, вырабы з саломы – усё гэта зроблена рукамі творчага і таленавітага  выхавацеля групы падоўжанага дня 3 “Г” класа Л.Ф.Тадарэнка.

Нават  дрэннае надвор’е першых  дзён зімы не перашкодзіла вучням і настаўнікам адчуць асалоду ад дотыку да беларускага нацыянальнага каларыту

 

28.11.2016 г.

ГІСТОРЫЯ І КУЛЬТУРА МАГІЛЁВА – У ФОТАЗДЫМКАХ

У рамках адзінага дня беларускага маўлення, які прайшоў у нашай гімназіі ў чацвер, 24 лістапада, вучні 8-10-х класаў сустрэліся са старшынёй Магілёўскай гарадской арганізацыі грамадскага аб’яднання “Таварыства беларускай мовы імя Францішка Скарыны” Алегам Уладзіміравічам Дзьячковым.

На сустрэчы, якія адбывалася ў актавай зале, грамадскі дзеяч і краязнаўца А.У. Дзьячкоў, абапіраючыся на фотаздымкі або выявы нашага горада розных стагоддзяў, у даступнай і цікавай форме паведаміў вучням пра найбольш цікавыя факты з гісторыі горада, пра яго славутых ураджэнцаў – Мікалая Судзілоўскага, Ота Шміта, Спірыдона Собаля, Віктара Турава.

У сваім выступленні А.У. Дзьячкоў шмат увагі надаваў архітэктурнай спадчыне Магілёва, паведаміў пра жыццё і дзейнасць каталіцкага архіепіскапа Станіслава Богуша-Сестранцэвіча і праваслаўнага мітрапаліта Георгія Каніскага.

Гімназістам было прапанавана адказаць на пытанні і выканаць заданні, якія дазволілі вызначыць уласны ўзровень ведання гісторыі роднага горада і беларускай мовы.

Паводле А.У. Дзьячкова, Магілёў па праве можа ганарыцца сваёй гісторыяй і архітэктурнай спадчынай. І хаця шмат помнікаў архітэктуры не захавалася да нагаша часу, існуе магчымасць іх аднаўлення ці ўсталявання памятных знакаў на месцы іх знаходжання.

Скончыў сваё выступленне А. У. Дзьячкоў дэманстрацыяй відэароліка пра наданне Магілёву Магдэбурскага права – права на самакіраванне.

 

25.11.2016 г.

У чацвер, 24 лістапада, адбылася інфармацыйная гадзіна, прысвечаная 115-годдзю з дня нараджэння Міхася Зарэцкага. Вучні прагледзілі прэзентацыю, прыгадалі старонкі біяграфіі і творчасці пісьменніка. Дзесяцікласнікі адзначылі, што Міхась Зарэцкі- пісьменнік, імя якога доўгія дзесяцігоддзі не з’яўлялася на старонках «Гісторыі літаратуры». А, між тым, Міхась Зарэцкі- майстар слова, першаадкрывальнік новых тэм і праблем у беларускай літаратуры, а ў 20-30-я гг.- адзін з найбольш папулярных і чытаемых нават за межамі Беларусі.

Паважаныя гімназісты! Чытайце творы пісьменнікаў-класікаў.

 

18.11.2016 г.

18 лістапада беларускаму паэту Анатолю Ільічу Вярцінскаму спаўняецца 85 гадоў. Гэтаму юбілею майстра слова ў гімназіі была прысвечана радыёгазета ,,Жыццё прадаўжаецца..." Прагучалі радкі з вершаў паэта. Яны вучаць нас жыць і думаць, цаніць жыццё, радавацца жыццю, любіць людзей.

Хвілінкі паэзіі ,,Было ў салдата два полі" і конкурс сачыненняў ,,А гэты рахунак прыблізны..." па творы Анатоля Вярцінскага ,,Рэквіем па кожным чацвёртым" сталі працягам ушанавання 85-годдзя нашага сучасніка, выдатнага беларускага паэта, драматурга, крытыка, перакладчыка, публіцыста.

 

 

11.11.2016 г.

ПАД ЗНАКАМ ТАЛЕНТУ І ПРАЦЫ

У чацвер,10 лістапада, адзіны дзень беларускага маўлення ў нашай гімназіі быў прысвечаны беларускім паэтам і пісьменнікам.

Амаль кожны з нас можа згадаць на памяць радкі Багдановіча ці Купалы, Коласа ці Куляшова, але далёка не ўсе могуць пазнаць пісьменнікаў і паэтаў па фотаздымках. Менавіта таму вучні сёмых класаў на працягу дня падыходзілі да вучняў і настаўнікаў гімназіі з фотаздымкам таго ці іншага пісьменніка і прасілі пазнаць яго. Калі не атрымлівалася адразу, дзеці давалі падказкі. Вельмі прыемна, што абсалютная большасць тых, хто прыняў удзел у акцыі, адразу або з першай падказці назвалі імёны пісьменнікаў, сярод якіх былі і Аркадзь Куляшоў, і Цётка, і Кузьма Чорны, і Пімен Панчанка. А настаўнікі нават пасля заканчэння акцыі абменьваліся думкамі пра тое, наколькі лёгка ці цяжка было пазнаць таго ці іншага мастака слова.

Таксама ў межах дня беларускага маўлення сямікласнікі і дзевяцікласнікі паспрабавалі выканаць анлайн-тэст па беларускай мове па тэме “Склонавыя формы назоўнікаў”. Прыемна здзівіла, што вучні, напрыклад, 9 “Г” класа адказалі правільна на 12 з 15 пытанняў!

Шануйце і беражыце беларускую мову, не забываючы размаўляць на ёй, шаноўнае спадарства!

 

 

27.10.2016 г.

СУСТРЭЧА ГАСЦЕЙ, АБО З РЫЖАНАМІ – ПА-БЕЛАРУСКУ!

У аўторак, 25 кастрычніка, у нашу гімназію завітала дэлегацыя вучняў і настаўнікаў з Беларускай школы імя Я. Купалы г. Рыгі.

Адразу пасля прыезду ў гімназію гасцей з Латвіі павіталі ў актавай зале, дзе перад рыжанамі выступіў дырэктар гімназіі А.Ф. Цвілік. Пасля прагляду прэзентацыйнага роліка пра Магілёўскую гарадскую гімназю №1 настаўніца беларускай мовы і літаратуры Г.У. Бандарэнка запрасіла гасцей падзяліцца на групы і стаць удзельнікамі майстар-класаў па вышыванцы, выцінанцы і стварэнні лялькі-абярэга.

Натхнёныя пабачаным і створанымі ўласнымі рукамі сувенірамі госці вярнуліся ў актавую залу, дзе распачалася літаратурна-музычная гасцёўня “Мой гонар і радасць мая - Магілёў”. Госці з Латвіі не толькі паслухалі шэраг музычных кампазіцый ў выкананні вучняў і педагогаў нашай гімназіі, але і пазнаёміліся з гісторыяй і культурай Магілёва і вобласці, паслухалі вершы беларускіх паэтаў, пабачылі беларускіх асветнікаў, вобразы якіх у тэатралізаваным прадстаўленні таленавіта стварылі гімназісты.

Напрыканцы вечарыны рыжская дэлегацыя атрымала сімвалічны падарунак – герб г. Магілёва. Вельмі прыемна было пачуць у адказ запрашэнне наведаць Латвію і шчырыя словы падзякі!

 

 

21.10.2016 г.

Родная беларуская мова багатая на словы, якія кожны з нас выкарыстоўвае ў паўсядзённым жыцці.  Мы павінны імнуцца да таго, каб не збядняць мову, а ўжываць як мага больш слоў – прыгожых, яскравых, трапных.

Музыкантамі  і даследчыкамі, матэматыкамі і следчымі маглі адчуць сябе ўдзельнікі лінгвістычнага конкурсу “Спаборніцтвы мовазнаўцаў”, які адбыўся ў гімназіі ў мінулы чацвер, 20 кастрычніка. Настаўнікі беларускай мовы і літаратуры і вядучыя запрашалі канкурсантаў да ўдзелу ў “Тэарэтычнай размінцы”, Гістарычных спрэчках”, “Гонцы за лідарам” і  іншых конкурсах. На працягу мерапрыемства ўсе жадаючыя маглі наведаць “Парк сінонімаў”, “Фразеалагічны звярынец” і “Лексічную краму”.

Вынікам спаборніцтваў стала засваенне ўдзельнікамі конкурсу шэрагу цікавых звестак аб асаблівасцях беларускай мовы, практыкаванне ў пабудове выказванняў у розных моўных абставінах  і, канешне, добры настрой. А перамагла, як заўсёды, дружба.

 

13.10.2016 г.

"Мы ўсе жывём пад зоркамі матуль"

Мамачка! Матуля! Матулечка!

Менавіта гэтыя цёплыя і пяшчотныя словы гучалі з вуснаў гімназістаў і іх настаўнікаў у чацвер.

13 кастрычніка ў межах адзінага дня беларускага маўлення адбыліся мерапрыемствы, прысвечаныя Дню маці.

Вучні дзясятых класаў падрыхтавалі стэндавую інфармацыю “Мы ўсе жывём пад зоркамі матуль”, дзевяцікласнікі разам з супрацоўнікамі бібліятэкі запрасілі вучняў гімназіі на  выставу твораў мастацкай літаратуры “Гэта вечнае слова  -  Маці”. Не засталіся ў баку і вучні пачатковых класаў, якія бралі ўдзел у праекце “Зробім самі падарунак маме”: іх прыгожыя сувеніры і паштоўкі з подпісамі  парадуюць сёння самых родных і дарагіх матуль. Вучні пятых класаў дэманстравалі свае веды, кемлівасць і знаходлівасць  у лінгвістычным конкурсе “З любоўю да матчынай мовы”.

У межах акцыі “Букет для мамы” кожны гімназіст меў магчымасць пазначыць свае віншаванні для маці на пялёстках прыгожых кветак.

Як кажуць, свята працягваецца... Павіншуйце сваіх родных матуль на роднай беларускай мове!

 

07.10.2016 г.

“Залатая, асенняя раніца!”

У чацвер, 6 кастрычніка, у нашай гімназіі адбыўся чарговы дзень беларускага маўлення, гэтым разам прысвечаны чароўнай пары года – залатой восені.

У межах акцыі “Размаўляй са мной па-беларуску” шасцікласнікі наведалі вучняў пачатковых класаў. Старшакласнікі чыталі дзецям вершы пра восень, загадвалі загадкі на восеньскую тэматыку.

Сямікласнікі ў гэты дзень напісалі замалёўку “Шматфарбная восень”, а вучні 9-х класаў праверылі сваю эрудыцыю, адказаўшы на пытанні віктарыны “Восень у творах беларускіх пісьменнікаў і паэтаў”.

Вельмі прыемна было бачыць, як радаваліся дзеці адгаданым загадкам ці правільным адказам на пытанні! І сапраўды, восень – чароўная пара года. І нельга не пагадзіцца з Уладзімірам Дубоўкам, які пісаў:

Залатая, асенняя раніца!

Хараством ты на свеце адна.

Сонца ў пушчы глыбокай купаецца

і ніяк не дастане да дна...

 

 

04.10.2016 г.

 

02.10.2016 г.

Памяці Ніла Гілевіча прысвячаецца

У чацвер, 29 верасня, у нашай гімназіі ў межах адзінага дня беларускага маўлення адбыліся мерапрыемствы, прысвечаныя папулярызацыі беларускай мовы і літаратуры.
Так, вучні старэйшых класаў прынялі ўдзел у конкурсе чытальнікаў вершаў народнага паэта Беларусі Ніла Гілевіча, якому селёта споўнілася б 85 год. А першы ўрок пачаўся з выпуска радыёгазеты, прысвечанай 85-годдзю народнага паэта.

Сямікласнікі, якія праводзілі штотыднёвую акцыю “Размаўляй са мной па-беларуску”, падыходзілі к настаўнікам і вучням гімназіі з пытаннем пра іх любімае беларускае слова. Калі ласка, дзякуй, сябар і нават падабайка – больш за 100 вучняў і настаўнікаў далі свае адказы ўдзельнікам акцыі. Па выніках апытання будзе створаны адмысловы слоўнік любімых беларускіх слоў вучняў і настаўнікаў гімназіі №1, з матэрыяламі якога можна будзе азнаёміцца на стэндзе гімназіі.

Абноўленыя матэрыялы стэнда “Дзень беларускага маўлення” пазнаёмілі ўсіх ахвотных ў гісторыяй Дня беларускага пісьменства і вандроўкамі па сталіцах гэтага свята настаўніка беларускай мовы і літаратуры Каласоўскага Ю.У.

Будзьма з мовай!
 

 

22.09.2016 г.

Размаўляй са мной па-беларуску, або

Што вы ведаеце пра беларускае кнігадрукаванне?

 

У чацвер, 22 верасня, у нашай гімназіі дзень беларускага маўлення быў прысвечаны беларускаму кнігадрукаванню.

На працягу дня група вучняў не толькі размаўляла па-беларуску з настаўнікамі і вучнямі гімназіі, але і задавала пытанні пра беларускае кнігадрукаванне. Ці ведаеце вы, у якім горадзе знаходзіцца помнік літары Ў? А што вы скажаце пра гарады, у якіх друкаваў кнігі Францішак Скарына? Якія сінонімы вы можаце падабраць да слова азбука?

Таксама ў фае гімназіі быў аформлены стэнд “Смак беларускай мовы”, дзе на яркіх фотаздымках і паштоўках паказана лексічнае багацце беларускай мовы, праілюстраваны беларускія прыказкі. Асобны раздзел стэнда – “Апранайся па-беларуску” – дапаможа даведацца, як правільна называць адзенне, абутак.

А некалькі вучняў 7-х класаў падрыхтавалі плакаты “Я люблю беларускую мову!”. Любіце ж беларускую мову і размаўляйце на ёй і вы, шаноўнае спадарства!

 

15.09.2016 г.

АДЗІНЫ ДЗЕНЬ БЕЛАРУСКАГА МАЎЛЕННЯ

“Не пакідайце ж мовы нашай беларускай, каб не ўмёрлі” – пісаў яшчэ ў ХІХ стагоддзі класік беларускай літаратуры Францішак Багушэвіч. На жаль, актуальным гэты заклік застаецца і для нас, беларусаў ХХІ стагоддзя.

Таму ў 2016-2017 навучальным годзе кожны чацвер будзе адзіным днём беларускага маўлення.

У гэты дзень у нашай гімназіі будуць праводзіцца разнастайныя гульні, конкурсы і віктарыны, накіраваныя на папулярызацыю беларускай мовы. Мы не заклікаем вас адразу перайсці на беларускую мову. Не патрабуем размаўляць на беларускай мове цэлы дзень. Як рака пачынаецца з крыніцы, так і вы, калі ласка, пачніце з малога: прыміце ўдзел у акцыі ці конкурсе, павітайцеся па-беларуску, скажыце “дзякуй” за тое добрае, што зробяць у гэты дзень вам.

І гэтае “дзякуй”, паверце, гулкім рэхам адгукнецца ў стагоддзях беларускай гісторыі і шчырым “калі ласка” прагучыць у вуснах нашых нашчадкаў.

У гэты чацвер, 15 верасня, вашай увазе прадстаўлены тэматычны стэнд “Святло роднай мовы”, дзе паказана багацце лексікі беларускай мовы.

Не праходзьце міма!

 

УпрОбрМогОблИсполкома

МГОИРО

Управление образования, спорта и туризма  Могилевского горисполкома

Областной профориентационный портал

 

Счетчик посещений 

 

Обслуживание сайта:

Шинкевич Наталья n180773@yandex.ru

Любавина Светлана cvlub@yandex.ru

Разработчики сайта:

Шинкевич Наталья n180773@yandex.ru

Косарева Анна sun_ann@tut.by